Maulde

Maulde
Maulde en oumligg'nde gemêentn
Geografie
Regio	Hauts-de-France
Departement	Noorderdepartement
Arroundissement	Valencyn
Kanton	Sint-Amands an de Skarpe
Coördinoatn	50°30′NB 3°26′OL
Ippervlak	5,18 km²
Inweuners
Inweuners Bevolkiengsdichtheid	1026 (2017) 198 inw./km²
Andere
Burgemêester	Nicolas Bouchez
Postcode	59158
Webadres	Site van Maulde

Maulde es e gemêente in Vrankryk in't Noorderdepartement. 't Ligt hil o de ôostzuudkantn van Frans-Vloandern teegn de schreeve mè Frans-Enegouwn. Maulde ligt hil in't nôordn van't arroundissement Valencyn, an de Schreeve teegn de provinsje Enegouwn. 't Grenst an de Woalsche gemêente Brunehaut (mêer bepoald de dêelgemêentn Bléharies en Laplaigne) en an de Fransche gemêentn Mortagne-du-Nord, Thun-Saint-Amand en Lecelles.

O d'ôostkantn van Maulde lôopt de Schelde, die ier Vrankryk verlat en belgië binn'nstrôomt, 't center van't dorp ligt ip de lienkeroever. Wa mêer o de zuudkantn van de plekke moundt de Skarpe uut in de Schelde.

In tydde stound er juuste bezuud'n de gemêente de stoasje Maulde - Mortagne an d'yzerboane die liep van Sint-Amands an de Skarpe tout an de Schreeve, en die ezo vodder liep richtienge Dôornik. Ip 22 ogustus 1950 wierd 't verkêer vo mienschn stopgezet, en sedert 2015 ryd'n der ôok gin goeder'ntrings mêer en wierd de lynne ipgebrookn.

Maulde es êen van de gemêentn die liggn in't Regionoal Nateurpark in't bekkn van de Skarpe en de Schelde (Parc naturel régional Scarpe-Escaut), zynde 't gebied round Sint-Amands an de Skarpe die beschermd es deur zyn uutgebreyde biodiversityt.

Beziensweirdigeedn

• De Sinte-Pieterskerke
• De groundvest'n van 't vroegere Fort de Beurnonville, da gebouwd es volgest 't plan van Séré de Rivières tusschn 1881 en 1884, en genoemd noar generoal en moarschalk Pierre Riel de Beurnonville. 't Fort wierd gebouwd boovnip de Mont de Ligne, nen euvel die e goe zicht biedt oover de vlakte van de Skarpe en de Schelde. De plekke wierd in 1792 in tydde van de Fransche revoluusje-ôorloogn gebruukt vo 't leegerkamp van generoal Dumouriez teegn d'Ôostnryksche troepn in de Zuudelyke Nederlandn.
• Ip't groundgebied van Maulde liggn der ôok verschilligte koazemattn uut 't ende van de joarn '30, juuste vo de Twidde Weireldoorloge, die en ounderdêel woarn van 't plan van de Maginotlinie.

• 
  De Sinte-Pieterskerke van Maulde
• 
  Koazemat van de Maginotlinie

Ofbeeldiengn die ier by passn ku je vien in de categorie Maulde (Nord) van Wikimedia Commons.