Paleoantropologie

Paleoantropologie is e studie woarby dan uutgestorvn mensachtign bestudeerd wordn. De paleoantropoloogn probeern mè fossieln, alloam en andere bronn lyk DNA, inzicht te krygn in 't oentstoan en d'evoluusje van de mens.

Fossiele schedels van mensachtign (Museum vor Osteologie, Oklahoma City, Oklahoma, USA.)

Paleoantropologie kwam ip in de 19e êeuwe en in de 20e êeuwe zyn der vele fossiele overbluufsels gevoendn, surtout in Afrika.

Geschiedenisse van de paleoantropologie

De moderne paleoantropologie begunt in de neegntienste êeuwe met d'oentdekkienge van de neanderthaler. Der was e tyd dan ze peisdn da menschn gelyk zoun zyn an sommigte grôte mensoapn. 't Gedacht van de biologische evoluusje van sôortn was nog nie anveird. Da gebeurde moar achter de publicoasje van Charles Darwins werk Den ôorsproeng van sôortn in 1859. Darwin zyn êeste boek gieng nie over d'evoluusje van de mens moa de gevolgn vor andere oenderzoekers in zyn tyd woarn duudelyk. Discuusjes tusschn Thomas Huxley en Richard Owen giengn over de menschelyke evoluusje.

Sedert Carolus Linnaeus zyn vanwege uuterlyke overêenkomstn de grôte mensoapn anzien lyk de nauwste verwantn van de mens. In de neegntienste êeuwe veroendersteldn ze dat uze nauwste nog leevnde verwantn de chimpansees en gorilla's woarn. Ook wierd veroendersteld dat de mens en d'Afrikoansche oapn e gemêenschappelyke vôorouder zoun èn en ze geloofdn dan fossieln van die vôorouders uutendelyk in Afrika zoun gevoendn wordn.

In de joarn twientig van de twientigste êeuwe zyn der uutendelyk fossieln van hominiedn gevoendn in Afrika.

Andere weetnschappn

Andere weetnschappn die dichte by de paleoantropologie stoan zyn archeologie, antropologie en paleontologie.