Sigismund (HRR)

Sigismund van Luxemburg (ook Sigismund van Hongareye genoemd) (Nurnberg, 15 februoari 1368 – Znojmo (Moravië), 9 december 1437) kwam keurvorst van Brandenburg achter 'n dôod van zyn voader keizer Karel IV in 1378 tout 1388 en van 1411 tout 1415.

Je was keunienk van Hongareye en Krowoasje van 1387, Rôoms-Duutsche keunienk van 1411, keunienk van Boheemn van 1419, keunienk van Italië van 1431 en keizer van 't Hillig Rôoms Ryk van 1433 tout 1437. Je was et latste mannelik lid van et Huus Luxemburg.

Sigismund was de derde zeune van keizer Karel IV en e joungere halfbroere van Wenceslaus (Wenzel van Luxemburg), die zyn voader ipvolgde als Rôoms-Duutsche keunienk, moar ofgezet wierd in 1400.

Keizer Sigismund deur Albrecht Dürer

Kruustocht van Nicopolis

Sigismund voeldeg hem al een ende bedreigd in Hongareye deur d'ipkomste van de Turksche Ottomoann langst de Donau en je vroegt doarom hulpe an 't westn. Uutendelik wierd er e coaliesje gevormd van et Christndom van over hêel Europa.

Sigismund leidde in 1396 de kruustocht, die gesteund wierd deur paus Bonifacius IX. 't Belangrykste dêel van 't leger bestound uut Frãnsche troepn van 't Hertogdom Bourgondië, angevuld deur andere Europeesche landn. De Frãnsche zoundn Jan als leider, in de plekke van zyn voader Filips de Stoutn, den hertog van Bourgondië. 't Is doa dat ie zyn bynoame Zounder Vrêes krêeg.

In september 1396 kwamt er een ende an de veldtocht deur et verlies van de kruusridders teegn sultan Bayezid I by de Slag van Nicopolis. Zowel Sigismund of Jan zounder Vrêes hen de Slag wel overleefd.

Vrouwn en jounges

Sigismund trouwde twi kis. Deur zyn êeste huwelik me Maria, dochter van Lodewyk I van Hongareye, kost ie keunienk van Hongareye wordn. Zy en under baby stiervn in 1395 achter e peirdaccident. Zyn twidde vrouwe was Barbara van Cilli. Met heur haad ie een dochter, Elisabeth van Luxemburg, die loater trouwde me de Habsburger Albrecht II, zyn ipvolger.

Ofbeeldiengn die ier by passn ku je vien in de categorie Sigismund, Holy Roman Emperor van Wikimedia Commons.