Sente-Boafs

Sente-Boafs (Nederlands: Sint-Baafs-Vijve) ligt an d'Leie en an de Mandle, en et een schôon Romaans kerkske. Sedert 1976 est t'ôpe me Wielsbeke.

In den draai up de Ryksweg staat 't stanbeeld van Jules. Eigentlik was da nen ounbekende soldaat uut 'n Eestn Oorloge, maar sedert dat Jules Vandenbossche ne kee zyn bulte up zyne rugge een bitje bygewerkt et, noemn z'em nu Jules.

Olle jare den twidde zundag van oktobre est er daar ondezwemmienge. D'ondjes voarn ze me 'n bôotje over de Leie en ze moetn ton zo rap of da ze keunn were keren noar uldre boaske. De rapstn es vaneigens gewonn.

Vroegre wos Sente-Boafs surtou un prochje van boern en vlasboazn. De Leie noemdn ze ton nog The Golden River. Ondertussn bluft er van 't vlas ni vele mer ovre. De welvoart es daarachtre gekoomn van ploatekootn (leem- en outspoanderploatn) en tapytweevryen (Balta in Sente-Boafs en Beaulieu in Wielsbeke).

Die grôte fabriekn en meddertyd wok tefrente butenlanders angetrokkn, die nu in grôte aantaln in Sente-Boafs, Wielsbeke en Wakkn weunn. De meste kommn ut Turkeye, Marokko of Tunesië. 't Zittn nateurlik ôok Algerjèns tussn.

De Leie es in de joarn 70 rechte getrokkn en verbrid voa groddere scheepn toe te loatn. Up t schêen tussn Sente-Boafs en Zulte (Oost-Vloandern) stoat ern nieuwe sluze, woa da ze wok 't woaterpeil mee regeln voa de Leie tussn Sente-Boafs en Mêende/Wervik.

Sente-Boafs es in de joarn 50 nog in 't nieuws gewist omda ze peisden dat 'r een spook roundvlôog. Surtou de kantn van de Loavre-oek (Loverhoek - Loverstraat). Nun slimme professre van Gent et ton ountdekt da 't nun veugle wos die zo zere koste vliegn en zukn roar leevn makte.

Begun de joarn 80 es ter ton nog ne kee un slukstokerietje in de lucht gevloogn. 't Woaren un poar dôo en enigte zwoar gekwetste. Zen dat vaneigens ôok in de radjo en den televisje gezeid en getôogd.

Beziensweirdigheedn

Kykt noa Bouwkundig erfgoed in Sente-Boafs

Bekende Sente-Boafsnoaren

Den bekendsten es André Demedts. In zyn junge joaren et ie boekn geschreevn voa de junge gastn. Loatre wasnt den boas van radio Kortryk (VRT 2 West-Vlaanderen). D'oude pastrie nevest de kerke es nu parochjaal centre en en ze noar em genoemd.

Ofbeeldiengn die ier by passn ku je vien in de categorie Sint-Baafs-Vijve van Wikimedia Commons.