Slag by Bulskamp
De Slag by Bulskamp (1297) wos êen van d'anlôopn nor de Guldnspoornslag.
De voôrgeschiedenisse
bewerknPhilippe IV van Vrankryk, ôok wel Philippe de Schoonn genoemd, wos de klêenzeune van Louis IX en wierd keunienk van Vrankryk in 1285. In teegnstellinge tot zyn grôotvoader probeerdn em de macht te centroalizeern. De groave van Vloandern, Gwyde van Dampierre, wos doa vaneigenst nie mee gediend, mor ne koste nie belettn da Philippe IV controleurs no Vloandern zound voun te kykn out olles wel volgens zyn wettn gounk. En zyder voundn compagnongs by e klêen dêel van de burgery, die ôok de macht van de groave wilde inperkn. Doadeure zocht de groave ulpe by 't geweune vook, de gildn en de boern. De franskiljongs wierdn Lelioards genoumd, no 't Fransche woapnschild en 't geweune vook wierd êest Lieboars en loater Klauwoars genoumd, no 't Vlamsche woapnschild.
In 1297 escaleerde 't conflict. De groave ad e verdrag mè den Iengelsche keunienk Edward I, woavan dat 'n peisde dat 'n machtig en te betrouwn wos en achter e verôordêelinge deur 't Fransche parlement zeidt 'n zyn êed an Vrankryk up, wuk dat in feite e sôorte onafankelikheidsverkloaringe va Vloandern wos.
De slag zelve
bewerknPhilippe IV wos vroet va coleire vaneigenst en ne zound e leger no Vloandern. De groave a gepeisd van ulpe te krygn vanuut Iengeland, mo Edward I wos zelve druk bezig mè nen upstand van de Schottn en ezô bestond et Vlamsche leger surtout uut minschn uut Kassel en Veurne mit e bitje ulpe uut Brugge en 't Brugse Vrye. 't Wierd geleid deur Willem van Gulik den oudn, e klêenzeune van de groave Gwyde van Dampierre. 't Fransche leger wierd geleid deur Robert II van Artois. Oun de Vlamsche ridders 't Fransche leger zoagn ofkommn up woensdag den 20stn oeste, in Bulskamp, gingn ze der rechte up of, zounder rekeninge 't oudn mè 't voetvook da nie mêekost. Da wos vaneigenst nie echt slim, omda ze nu in twêe groepn moestn vichtn. Achter nen artn en bloedigen bataille wierdn ze ton ôok versleegn. De ridders vluchttn nor Yper en 't voetvook zochte schuttinge in Veurne. Willem van Gulik den Oudn et nie overleefd.
Gevolgn
bewerknIn't joar 1300 gaf Gwyde van Dampierre, groave van Vloandern em over en ne vloog t'ôpe mè zyn twêe oudste zeuns en e poar gastn van 'n oadel in e prisong in Vrankryk. Vloandern wierd were tôpe by Vrankryk gesmeetn en Jacques de Châtillon wierd gouverneur, gezeteld in Brugge. Deur zyn arrogante gedroagingn en vele geweld et ie em nie populair gemakt by de Vloamingn, surtout nie in Brugge, die van te vôorn pertank ôok nie vele moestn weetn van de groave en in 't begun zounder rutteln 't gezag van Vrankryk anveirdn. 't Malcontentement van de Bruggelingn wos d'anleidinge vo de Brugse Mettn.
Bronne
bewerknSlagveld van Europa, Duizend jaar oorlog in de zuidelijke Nederlanden, Marc Gevaert, Globe(2007)