Steunbeir

Ne steunbeir of contrefort es e versterkienge an den buutnkant van grote gebouwn, surtout van kasteeln, kerkn en kathedroaln.

E reke steunbeirn lanks de Munster van Freiburg, Duutsland

Steunbeirn zyn gemetselde verdikkiengn an de zydskantn van buutnmeurn. Ze versmolln na boovn toe. Ze dienn vo de zydeliengsche druk up te vangn die van de zwoare gewelvn vanbinn komt. Zounder die steunbeirn zoudn de buutnmeurn letterlik uut mekkoar volln.

By gotische gebouwn zyn de steunbeirn zelfs hogger dan de buutnmeurn. Z'oundersteunn zo de luchtboogn die dezelfste functie hèin lik steunbeirn: de zydeliengsche druk van d'hogste meurn upvangn.

Klindere gebouwn hèin dikkers gin steunbeirn. Da komt omdan ze zynder meestol e lichtere houtnde zolderienge hèin in de plekke van steenn gewelvn.

Ofbeeldiengn die ier by passn ku je vien in de categorie steunbeirn van Wikimedia Commons.