Tapirs

Dat artikel es geschreevn in 't Noordelik West-Vlams.

Tapirs

Vier sôortn tapirs

Ryk:	Animalia (Bêestn)
Stamme:	Chordata (Chordabêestn)
Klasse:	Mammalia (Zoogbêestn)
Orde:	Perissodactyla (Oeneevnhoevign)

Familie

Tapiridae
Gray, 1821

Tapirs (Tapiridae) zyn êen van de drie families van d' oeneevnhoevign (Perissodactyla), neffest de peirdachtign en de neushoorns. Der bestoat nog moar êen geslacht, Tapirus. Ze leevn in de jungle- en busgebiëd'n van Zuud- en Mid'n-Amerika en Zuudôost-Azië. Der zyn wel nog fossieln bekend van over hêel de weireld.

Joenge tapirs zyn gestriept. Ip loatere leeftyd komn ze doenkerbruun en d' Aziatische sôorte krygt e wit'n achterkant. 't Zyn plante-eters die met hunder korte slurf bloarn en taksjes van de boomn kunn trek'n. Ze zoek'n allêne moa contact mè mekoar in 't poarsizoën.

E tapir kan hemzelve allêne moa verdedign deur styf zêre weg te loop'n. Z' hèn e styf dik en toai vel, surtout roend hunder nekke. Doarom geroak'n ze moeilik dôdelik gekwetst deur hunder grotste vyand'n, de grôte katachtign, die hunder prooie surtout in hunder nekke byt'n.

Sôort'n

Der zyn vier erkende bestoande sôort'n tapirs, allemoale in 't geslacht Tapirus: de Zuud-Amerikoanschn tapir of lêeglandtapir (Tapirus terrestris), d'n Aziatischn tapir of Indischn tapir (Tapirus indicus), de Mid'n-Amerikoanschn tapir of Bairds tapir (Tapirus bairdii) en d'n bergtapir (Tapirus pinchaque). In 2013 peisdegn ênigte oenderzoekers dan z' e vuufde sôorte tapir g'identificeerd ha'n, de kabomani-tapir. Moa 't bestoan van dien tapir lik 'n aparte sôorte wordt algemêen betwist. Recent genetisch bewys suggereert dat 'n in feite dêel uutmakt van de Zuud-Amerikoanschn tapir.

Lêeglandtapir (Tapirus terrestris)
Aziatischn tapir (Tapirus indicus)
Mid'n-Amerikoanschn tapir (Tapirus bairdii)
Bergtapir (Tapirus pinchaque)

Ofbeeldiengn die ier by passn ku je vien in de categorie Tapiridae van Wikimedia Commons.