Vladislav II

Vladislav II (of: Vladislaus, Władysław, Wladislas, en in 't Hongoars Ulászló), van 't Huus Jagiello, (Krakau Pooln, 1 moarte 1456 - (Buda (e stik van Budapest), 13 moarte 1516), was van 1471 tout 1516 keunienk van Boheemn, en van 1490 tout 1516 keunienk van Hongareye en Krowoatië.

Je was den oudste zeune van Casimir IV Jagiellon en Elisabeth van Ôostnryk, dochter van de Rôoms-Duutsche keunienk Albrecht II van 't Huus Habsburg.

Êeste Congres van Weenn

Houtsnede deur Albrecht Dürer van de Wiener Doppelhochzeit.
Van lienks: Maximiliaan I; zyn klêendochter Maria mè Lodewyk; Vladislav mè zyn dochter Anna en zyn broere Sigismund I

In 1515 wierd et êeste congres van Weenn g'houdn. De Habsburgsche keizer Maximiliaan I kwamt doa tegoare me Vladislav en zyn broere Sigismund I van Pooln. Ze bevestigdn et Habsburg-Jagiello successieverdrag dan ze in 1506 geslootn haan. D'ofsproake was dat de twi klêenkienders van Maximiliaan (Ferdinand en Maria) zoun trouwn me d'ênigste kienders van Vladislav (Anna en Lodewyk).

't Dubbel huwelik, de Wiener Doppelhochzeit genoemd, is te zien ip 'n houtsnede deur Albrecht Dürer. De fêeste giengt deure ip 22 juli 1515 in de Stephansdom in Weenn. Maximiliaan was platsvervanger vo zyn klêenzeune Ferdinand, die zelve nie anwezig was.

't Zorgde vor e keerpunt in de geschiedenis van Midden-Europa, want elf joar loater, ip 29 ogustus 1526 sneuvelde Lodewyk II in de Slag by Mohács teegn sultan Süleyman de Grôotn van 't Ottomoans Ryk. Deurdat ie gin wettige jounges haad wierd Ferdinand verkoozn als ipvolger en kwoamn Hongareye en Boheemn ounder 't Huus Habsburg.

Et Habsburg-Jagiello successieverdrag vergrotte uutendelik de macht van de Habsburgers en verminderde da van 't Huus Jagiello. 't Was 't ende van de Hongoarsche bloeiperiode.

In 1541 wierd Hongareye ipgesplitst in drie stikkn. Ferdinand I krêeg allêne et nôordwestelik stik, et keunienklik Hongareye. János Zápolya krêeg Transsylvanië, en 't derde en grotste stik gieng no Süleyman ounder de noame Ottomoans Hongareye.

Vrouwn en jounges

1. Barbara van Brandenburg
2. Beatrice van Noapels
3. Anna van Foix. Met heur haad ie zyn twi ênigste wettige jounges:
   1. Anna van Boheemn (1503-1547)
   2. Lodewyk II van Hongareye (1506-1526)

Vladislav stierf twi weekn achter zyn 60ste verjoardag in de stad Buda. Zyn begroavienge was zes doagn loater in de kathedroale van de stad Székesfehérvár, woa dan al de Hongoarsche keuniengn begroavn wierdn.

Ofbeeldiengn die ier by passn ku je vien in de categorie Vladislaus II of Bohemia and Hungary van Wikimedia Commons.