Witzand

Witzand Wissant
Witzand in't arroundissement Bonen
Geografie
Regio	Hauts-de-France
Departement	Nauw van Kales
Arroundissement	Bonen
Kanton	Devern
Coördinoatn	50°53′NB 1°39′OL
Ippervlak	12,79 km²
Inweuners
Inweuners Bevolkiengsdichtheid	988 (2015) 77 inw./km²
Andere
Burgemêester	Bernard Bracq
Postcode	62179
Webadres	Site van Witzand

Witzand (Frans: Wissant) es e gemêente in't Fransche departement Nauw van Kales in't arroundissement Bonen.

Dyk van Witzand en Koap Zwartenesse in de verte

Liggienge

Witzand ligt an de Opoalkust an de zêenauwte van Kales, ongeveer tusschn Koap Blankenesse en Koap Zwartenesse. 't Grenst an de gemêentn Skoale, Hervelingn, Ondsberg en Terdingem. 't Stadje noemt zyneign le perle sauvage d'Opale ("de wilde peirel van d'Opoalkust").

Witzand es 'n typischn badstad en der komm'n in de zommer vele touristn. Deur zyn goe liggienge mè o wezekantn de zêe en vele wind, es Witzand ôok styf populair by windsurfers en kitesurfers. 't Zo êen van de beste plekkn van hil Vrankryk zyn vo te surfn. In 2013 es Witzand nog genomineerd gewist by de verkiezienge van favoriete plekke van Vrankryk in't televizje-programma Le Village préféré des Français en es ton ip de dertiende plekke g'endigd.

Bitje geschiedenisse

An 't strand van Witzand liggn d'r zwoare bunkers. Die maktn deel uut van den Atlantikwall die de Duutschers angeleid addn binst den Twiddn Weireldoorloge. Die kustverdedigienge liep van Nôorweegn tot Spanje en wos bedoeld vo nen meugelikschn anvol van de geallieerdn of te sloan. Die wos surtout in Vrankryk langs 't Kanoal styf uutgewerkt en zwoar bewakt. Want den oversteek vanuut Iengeland wos doa 't korst van ol, en dus goenk Hitler d'r van uut dan ze langs doar giengn anvolln.

Overstromienge in 2007

Up den 19sten moarte 2007 wos 't oogty, mei stravve noorderwindn en gigantisch oge zeegolvn. De stroatn stondn enstens onder woater en 't zeewoater sloeg de duunn over 'n dyk. 't Gevolg was desastreus: de mienschn in de wunstn langs den dyk moestn geëvacueerd zyn, et deur 't gewicht van 't woater en 't zand zakte den dyk van Witzand over e hele lengte deure. Up den lienkschn foto zie je langs den dyk e bitje vodder nog de zwoare granietbrokkn liggn die de gemeente eit loatn anvoern.

Witzand ligt an d'Opoalkust

De kerke van Witzand

Bunkers van de Atlantikwall

Ofbeeldiengn die ier by passn ku je vien in de categorie Wissant van Wikimedia Commons.