Woasland

't Woasland of 't Land van Woas is 'n historische en geografische streke in 't nôordôostn van de provinsje Ôost-Vloandern en e stiksje van de provinsje Antwerpn van nu. 't Woasland wordt in 't nôordn begrensd deur de grenze met Holland, in 't ôostn deur de Schelde, in 't zuudn deur de Schelde en de Durme, en in 't westn deur de voart Gent-Terneuzn.

't Land van Woas in 't Groafschap Vloandern

Noame

't Zou kunn dat de noame 'Woas' komt van 't Germoans 'wasu' wat da 'drassige ground' wil zeggn, ofwel van 'n oud Teutoons woord met de betêkenisse van 'slyk'. 'n Andere meugelikheid is 't Middelnederlands woord 'wastine' of woeste ground (te vergelykn mè 't Iengels 'wasteland').

Geschiedenisse

Historisch gezien was ter sproake van de Woasgouwe (pagus Wasiae), die dêel uutmakte van 't groafschap Vloandern.

Woasmunster is d' oudste parochie van 't Woasland. 't Land van Bevern mè zyn kastêeln was lange 't belangrykste polletiek center. 't Woasland kwam 'n ofzounderlik rechtsgebied deur de Keure van 't Land van Woas, die in 1241 verlêend is deur gravinne Johanna van Constantinopel.

In 't Middelnederlands bêestnepos Van den vos Reynaerde zyn der verschillige plekkn van 't Woasland vernoemd, lik Daknam by Lokern en Belsele by Sint-Nikloas.

Binst de Fransche bezettienge in 1795 was 't Woasland ounderdêel van 't Departement Schelde (Département de l'Escaut), die loater by 't Verênigd Keunienkryk der Nederlandn de provinsje Ôost-Vloandern kwam.

Symbool

Sins de zestienste êeuwe gebruukte de Keure van 't Land van Woas de roape vo symbool. De landbouw van 't Woasland was in tyde gekend vo 't kwêekn van roapn die in de wienter diendn vo de bêestn eetn te geevn.

Woapnschild van 't Woasland

Gemêentn in 't Woasland

In de provinsje Ôost-Vloandern:

• Bevern-Woas
• Kruybeke
• Lokern
• Moerbeke-Woas
• Sint-Gillis-Woas
• Sint-Nikloas
• Stekene
• Temse
• Woasmunster

In de provinsje Antwerpn:

• Zwyndrecht

Ofbeeldiengn die ier by passn ku je vien in de categorie Waasland van Wikimedia Commons.