Weireld Regiestre van Sôortn uut de Zêe
't Weireld Regiestre van Sôortn uut de Zêe ( iengels : World Register of Marine Species ; ofgekort : WoRMS ) is e databank die de bedoelienge êt van e deeglikke en volledige lieste ip te stelln van naamn van organismn uut de zêe [1].
Den inoud van 't regiestre wordt ipgemakt en oundroudn deur weetnschapplikke speesjaliestn vor iedre groep van organismn. Die taksonomiestn kykn of d' informoasje die ze van alle kantn krygn, zjuuste is. WoRMS weeroud de zjuuste naamn van de zêe-organismn, moa gift ook inlichtiengn oovre de synoniemn en d' oungeldige naamn. 't Is e werk van langen oasm vô 't regiestre by t'oudn, van der zyn oltyd moa nieuwe sôortn die ountdekt en beschreevn wordn deur de weetnschapprs. En doa boovnip, de naamgeevienge en de taksonomie van de bestoande sôortn wordt dikkers verbeeterd of gewyzigd ot er nieuw oundrezoek bekend grakt.
WoRMS wierd ipgericht in 2008. 't Is in d' êeste platse gesticht deur de Europese Unie en de gastêere is 't Vlams Instituut vô de Zêe in Ostende. WoRMS êet formêele oovrêenkomstn mê verschillnde andre projektn oovre biodiversiteit, woaroundre 't Systèèm vor Informoasje oovre de Weireld-Biodiversiteit ( iengels : Global Biodiversity Information Facility ) en de Encyclopedie van 't Leevn ( iengels : Encyclopedia of Life ). In 2008 wast de bedoelienge da WoRMS teegn 2010 e volleedige ipsommienge zoud ên van al de zêesôortn, 't joar woarin de Tellienge van 't Zêeleevn ( iengels : Census of Marine Life ) grêed was [2].
In meie 2012 a WoRMS liestn vô 213 001 geldige zêesôortn woavan dr 193 289 gecontrolleerd woarn. De bedoelienge is va mêt oungevêer 240 000 zêesôortn grêed te kommn [3].
Verwyziengn
bewerkn<references>