Sent-Medoardskerke (Wervik)

De gotische Sent-Medoarskerke es één van de de grotste kerkn van West-Vloandern. Ze makt zy deel uut van de federoatie Wervik-Gilwe.

Architecteure en geschiedenisse

De bouw van de basilicoale kerke es begunn in de 14ste eeuwe en z'es zy ofgewerkt gewist round 1440. Doavoorn moet er e romoansche kerke gestoan hèin. 't Enigste da doa nog van overbluuft, es de romoansche crypte uut de 13e eeuwe.

De kerke es upgetrokkn in Boalegemse kolkzandsteen. Heur torre es 86 mèiters hoge. Den steenn top mèi den achtkantigen lanteirn es der moar in 1902 upgezet gewist. 't Koor en en deel van de kruusbeuke zyn in Scheldegotiek, de rèiste es in Broabantsn hooggotiek.

Juste buutn de kerke stoat er en standbeeld uut 1926 gewyd an 't Hillig Erte.

Interieur

Wuk da van binn surtout upvolt:

epitoafn (grafreliëfs) uut de vichtienste eeuwe, geschendeerd binst den beeldenstorm up 15 ogustus 1566
de kapelle van Diederik van Gherbode (vichtienste eeuwe), roadshere van de Bourgondische hertoogn. In die kapelle stoat er e gildekasse uut de 16e eeuwe.
de andoenlikke moar zwoar geschendeerde gisant up de graftombe van ridder Ervé de Meriadech (vichtienste eeuwe)
et offerblok "de sloave" (zeevntienste eeuwe)
nen eekn preekstoel uut 1674
nen barokkn biechtstoel uut 1724
religieuze schilderyen:
- D'Hillige Familje, deur Jacob van Oost de Jonge, ca. 1700
- De Bekerienge van Paulus en De Verloochenienge van Petrus, deur Jan van Orley, 1725
- Hemelvoarte van Merria, deur nen 17e eeuwschn Vlamschn meester
- Sent-Antonius van Padua, deur Dinonisio Flamingo, 16e eeuw

Trivia

D'eertshertoogn Albrecht en Isabella hèin Wervik in 1608 bezocht en z'hèin zynder gezei dat er in heel Vloandern gin schondere kerke te vindn en wos.

Sinsn 1964 es de kerke en beschermd monument.

Externe koppeliengn

Beschryvienge van de kerke up westhoek.be