Liggienge van de provinsje Ulster in Ierland

Ulster (Iers: Ulaidh of Cúige Uladh) is één van de vier traditionele Iersche provinsjes, geleegn in 't noordn van Ierland. 't Bestoat uut neegn groafschappn. Sedert 1922 wordt de provinsje gesplitst deur d' "Iersche grenze": drie groafschappn (Cavan, Donegal en Monaghan) moakn deel uut van de Republiek Ierland, d' andere zesse (Antrim, Armagh, Derry/Londonderry, Down, Fermanagh, Tyrone) vormn Noord-Ierland, e deel van 't Vereenigd Keunienkryk (VK).

Ulster grenst an twèe andere provinsjes, Connacht in 't zuudwesten en Leinster in 't zuudoostn. 't Grenst in 't westn en 't noordn an den Atlantischn Oceoan. In 't oostn wordt de provinsje gescheid van 't eyland Groot-Brittannië deur 't Noordkanoal die den oceoan verbiendt met d' Iersche Zee.

Ulster hèt e bevolkienge van juste meer of 2 miljoen menschn en 'n ippervlak van 21.552 vierkante kilometer. Oengeveer 62% van 't gebied van Ulster ligt in 't VK, d' overige 38% in de Republiek Ierland. De grotste stad is Belfast mè meer of 'n half miljoen inweuners.

De meeste menschn in Ulster klappn Iengels. Groote deeln van County Donegal zyn Gaeltachtgebiedn woar dat Iers d' eeste toale is. Sommigte menschn in West-Belfast spreekn ook Iers, surtout in de "Gaeltacht Quarter".

Wikimedia Commons