Verdinaso
't Verdinaso wos e bewegieng in België in 't interbellum, opericht deur Joris Van Severen. Verdinaso is de ofkortieng va Verbound van Dietsche Nationaal Solidaristen.
Corporatisme e fascisme
bewerknAchter 'n Êestn Weireldôorlog aj overol in Europa extreme partyen e bewegiengn, zowel aan de lienkse of de rekse kant. 't Verdinaso is opericht op 6 oktober 1931 en wilde de moatschappy en de stoat ommevormn tout e corporatistiesch gehêel. Doarin is de bevolkieng ounderverdêeld ol noargelang nunder economischen groep da ze vertegenwôordigen. Doamei stoat 't corporatisme regelrecht tegenover e parlementair systêem woarin da 't volk ze verkooznn zelve kiest. Bovendien ad et corporatisme van 't Verdinaso ouk e fascistieschn inslag. Ni ollêne werkgevers e werknemers, moar ouk leedn van de (rekse) party zou'n ottomatiesch kunn zeteln in 't wetgevend orgoan.
Van anti-Belgie na Dietsland
bewerknEt Verdinaso ad oek e specifiek lokoal programma. In 't prille begun woarn ze anti-België, moa sedert de Nieuwe Marsrichting (14 juli 1934) veranderde sterke man Van Severen zyn plan: e wilde toet e verênigieng kommn tusschn Belgie, Olland, Frans-Vloandern e Luxemburg. Doamei verlôor 't Verdinaso oek voor e grôot dêel ze sympathie by de traditionele Vlamsche Bewegieng.
Oek ol wos Van Severen pro-Hitler, toch dei 'n geirn z'n eigen goeste. Toet op e punt zelve dat Nazi-Duutsland voelde da 't Verdinaso e kracht wos da ze ni kostn controleern. In 1941 e Duutsland toen ook bevooln om 't Verdinaso te fusioneern me de VNV. Da was 't ende van 't Verdinaso.