Romeinsche mythologie

De Romeinsche mythologie is de verzoamelienge van legendes en mythes van ’t antieke Rome. Van ôorsproeng Indo-Europees èt de Romeinsche mythologie in de loop van tyd religieuze en culturele ipvattiengn gelêend van landn die geleidelyk an g'integreerd zyn in de sfeer van Rome, lyk Grieknland, Egypte en Syrië.

De Capitolynsche wolvinne met den twêelienk Romulus en Remus.

De geboorte van Venus deur Sandro Botticelli.

De mêeste van de Romeinsche goodn zyn al vroeg g’influenceerd gewist deur 't antieke Grieknland en de lokoale goodn zyn dikwyls gelykgesteld met under Grieksche teegnhangers.

Volgens de Romeinsche mythologie zyn Romulus en Remus, e twêelienk van den oorlogsgod Mars en Rhea Silvia, deur e wolvinne gezoogd. 't Is uutendelyk Romulus die Rome gesticht èt ip 7 heuvels.

Romeinsche goodn

Vele goodn van de vroege Romeinn zyn nie bluuvn bestoan vanwege under abstract karakter, moar oendanks den hellenistischn invloed zyn toch verschillige lokoale godheedn gebleevn.

Ênigte Romeinsche goodn zyn:

• Bacchus, de god van de wyn, de fêeste en de zattigheid (by de Griekn oender de noame Dionysos)
• Cupido, zeune van Venus, de godinne van de liefde ('t Grieks equivalent is Eros)
• Diana, godinne van de jacht en de moane
• Faunus, oude nateurgod, beschermer van 't vee, loater gelykgestekd an Pan
• Janus, êen van d'ênigste goodn van d'êeste Romeinn die overgebleevn is. Ie was de god van 't begun en 't ende, van oopn-en toedoen. De moand januoari droagt zyn noame. Ie wordt ofgebeeld mè twêe oanzichtn
• Jupiter, den uppergod en god van den hemel, dunder en bliksem (zyn Grieksche teegnhanger is Zeus)
• Mars, god van den oorloge en 't gevecht ('t Grieks equivalent is Ares)
• Mercurius, god van de commerce, de financiële winste en de reizn en gids van de zieln in den oenderweireld (equivalent van Hermes by de Griekn)
• Minerva, godinne van ’t verstand en de kunst (Athena by de Griekn)
• Neptunus, god van de zêe (Poseidon by de Griekn)
• Pluto, god van den oenderweireld (Hades by de Griekn)
• Quirinus, e vroege Romeinsche god die tegoare mè Jupiter en Mars dêel uutmakte van den archaïsche goodntrias. Ie was de beschermgod van de Quirites, de Romeinsche burgers
• Saturnus, de Romeinse god van de landbouw en 't uutgezoaid groan. De zoaterdag (Saturni dies = dag van Saturnus) is noar hem vernoemd.
• Venus, godinne van de liefde (Aphrodite by de Griekn)
• Vesta, godinne van ’t heirdvier, huus en familie

Ofbeeldiengn die ier by passn ku je vien in de categorie Roman mythology van Wikimedia Commons.