Verdrag van Meerssen

Met ‘t Verdrag van Meerssen wierd ‘t ryk van Lotharius II verdêeld ounder zyn nounkels Karel de Kletsn en Lodewyk den Duuts, de broers van zyn voader Lotharius I. In 870 kwoamn ze tegoare in Meerssen vo ’t verdrag te têeknn. Meerssen ligt nu in Hollands (Nederlands) Limburg.

't Verdrag van Verdun (843)

't Verdrag van Meerssen (870)

‘t Frankisch Ryk was in 843 verdêeld gewist ounder de drie zeuns van Lodewyk de Vroomn met ‘t Verdrag van Verdun. Lotharius I, den oudstn, had ‘t middnryk gekreegn. ‘t Middnryk strekte van Friesland tout an de Provence mè nog e stik van Italië derby.

Nie lange vo zyn dôod hèt ’n zyn middnryk verdêeld ounder zyn zeuns Lodewyk II, Lotharius II en Karel van Provence met ‘t Verdrag van Prüm.

Lotharius II krêeg ’t mêest nôordelik stik van ’t ryk. Zyn keunienkryk strekte van de Nôordzêe tout an ’t Juragebergte w.o. ’t nôordelik stik van Bourgondië, en wierd regnum Hlotharii (ryk van Lotharius) genoemd. Loater in de 10e êeuwe wierd ’t gebied Lotharingia genoemd. Da was ’t begun van de noame Lotharingn.

Die verdêlienge he nie lange bestoan want Karel van Provence stierf ol in 863. Deurdat ’n gin jounges haad, verdêeldn zyn twi broers zyn bezittiengn ounder makoar.

In 869 stierf Lotharius II. Achter zyn dôod wast er grôte verwarrienge omdat 'n ollêne mor e bastoardzeune haad, Hugo II.

Keizer Lodewyk II, die eigentlik ha moetn ervn van zyn broere Lotharius II, was juste bezig met oorloge voern teegn de Saraceenn. Je veroverde Bari in 871. Zyn nounkels profiteerdn van die situoatië vor hunder mêester te moakn van Lotharingn en Karel de Kletsn viel 't gebied binn vo zyn erfdêel ip t’eisn. Achter e joar kwamt er ’n ende an de gevechtn en in 870 wierd ‘t Verdrag van Meerssen getêeknd:

• Lodewyk den Duuts krêeg Aken, twi derdn van Friesland, en ’t gebied ten ôostn van de Moas, de boovnlope van de Moezel en de nôordelikke Jura.
• Karel de Kletsn krêeg olles ten westn der van.

Keizer Lodewyk II probeerde nog zyn erfrecht ip t'eisn en j’had de steun van paus Adrianus II, mo dat is nie mè gelukt. Je stierf in 875.

Keizer Lodewyk II had ollêne mo dochters en dus ook gin ipvolger. Achter zyn dôod vertrok zyn nounkel Karel de Kletsn no Rome, vor hem tout keizer te loatn krôonn en je was ook ipvolger van Italië en Provence. Lodewyk den Duuts is nog e gevecht begost teegn Karel de Kletsn, mo j’is ol gesneuveld by ’t begun van de veldtocht in 876.

Nu da Lodewyk den Duuts ook dôod was, probeerde Karel de Kletsn ook nog zyn ôostelik stik van Lotharingn te verovern. Je viel Oost-Francië binn met e grôot leger, mo den 8stn oktober 876 ist ’n versleegn gewist deur ’t klinder leger van Lodewyks zeune Lodewyk de Joungn in de Slag van Andernach.

In 880, met ‘t Verdrag van Ribemont, hen de klêenjounges van Karel de Kletsn, Lodewyk III en Karloman, hunder westelik stik van Lotharingn ofgestoan an Lodewyk de Joungn, die azo hêel Lotharingn krêeg en zyn grenze kost verschuuvn no ’t westn.