Sikelin

Sikelin Seclin
Sikelin en oumligg'nde gemêent'n
Geografie
Regio	Hauts-de-France
Departement	Noorderdepartement
Arroundissement	Rysel
Kanton	Faches-Thumesnil
Coördinoatn	50°32′NB 3°01′OL
Ippervlak	17,42 km²
Inweuners
Inweuners Bevolkiengsdichtheid	12.463 (2016) 715 inw./km²
Andere
Burgemêester	Bernard Debreu
Postcode	59113
Webadres	Site van Sikelin

Sikelin (Frans: Seclin, Nederlands: Sikelijn) es 'n stad en e gemêente in Vrankryk in't Noorderdepartement. 't Ligt in Frans-Vloandern, mêer bepoald in Rysels-Vloandern, o de zuudkantn van Rysel zelve. 't Grenst an de gemêentn Wattenys, Templemars, Avelin, Attiches, Phalempin, Chemy, Gondecourt, Houplin-Ancoisne en Noyelles by Sikelin. By Sikelin ôorn ôok nog de gehuchtn Watiessart en Martinsart, die olletwêe o de zuudkant van de gemêente ligg'n.

O de westkantn van Sikelin lôopt richtienge de Deule 't Kanoal van Sikelin, wa in tydde gegroavn es vo de commerce en de drainoage van't woater uut de moerassn, mo die nu surtout wierd gebruukt vo langsn te wandeln of in villo te ry'n.

Deur 't groundgebied van Sikelin lôopt d'A1-ottostroade tusschn Rysel en Parys, die 'n ounderdêel es van d'E17. In Sikelin ester ôok 'n stoasje an d'yzerboane tusschn Rysel en Parys. Ôok lôopt er en ôogesneleydlynne vo TGV's deur't groundgebied van de gemêente.

Beziensweirdigeedn

• De Sint-Piatuskerke die êen van d'oudste kerkn van Rysels-Vloandern es; De funderiengn zod'n van de zeev'nde êeuwe zyn, van in tydde van de Merovingische keunienk Dagobert. Ze zo gesticht gewist zyn deur Sint-Elôoi, bisschop van Noyon en Dôornik, die ier e kerke liet bouwn ip de graftombe van d'n illign Piatus die da ze der in 287 zyn ôofd ofgekapt ein. De verêerienge van Sint-Piatus ad ier z'n ôogtepunt in d'elfde êeuwe en de kerke wierd ton serieus uutgebreyd. 't Uudige gebouw in gotischn styl es van de dertiende êeuwe, ze wierd gerenoveerd in de vuuftiende êeuwe en de torre van de kerke wierd in 1531 derby gebouwd. Ip't ende van d'n Êestn Weireldoorloge wierd de torre gedynamieteerd deur de Duutsche, wa ôok vrêe skoa dee an de reste van de kerke. An 't ende van de joarn 1920 wos de kerke were illegansn ersteld, mo bist d'n Twiddn Weireldoorloge wierd ze were g'abimeerd deur bombardement'n in 1940. De kerke es erkend lyk istorisch monument sedert 1920.
• De Sint-Jozefskerke
• De Sent-Eubertkerke
• 't Ouze-Lieve-Vrouwe-gastuus, da gesticht es gewist in 1246 deur groavinne Margaretha van Constantinopel. 't Es erkend lyk istorisch monument sedert 1932.
• 't Fort van Sikelin, ôok wel Fort Duhoux genoemd, da gebouwd es tusschn 1875 en 1880 volgest 't systêem Séré de Rivières.
• 't Duuts kerkof van Sikelin mè 1188 groavn van soldoatn uut d'n ôorloge

• 
  De Sint-Piatuskerke
• 
  't Ouze-Lieve-Vrouwe-gastuus
• 
  Ingank van't Fort van Sikelin
• 
  't Staduus van Sikelin

Ofbeeldiengn die ier by passn ku je vien in de categorie Seclin van Wikimedia Commons.