Broekkerke

Broekkerke Brouckerque
Broekkerke in't arroundissement Duunkerke
Geografie
Regio	Hauts-de-France
Departement	Noorderdepartement
Arroundissement	Duunkerke
Kanton	Groot-Sintn
Coördinoatn	50°57′NB 2°17′OL
Ippervlak	11,91 km²
Inweuners
Inweuners Bevolkiengsdichtheid	1356 (2016) 114 inw./km²
Andere
Burgemêester	Marie-Claude Lermytte-Bavay
Postcode	59630
Webadres

Broekkerke (Frans: Brouckerque) es e gemêente in Vrankryk in't Noorderdepartement. 't Ligt in Frans-Vloandern in de Fransche Westoek, mêer bepoald in't Blootland. 't Grenst an de gemêentn Groot-Sintn, Spyker, Pitgam, Loberge, Broekburg, Kroaiwyk en Loon. Teegn Kroaiwyk en Broekburg ligt ôok nog 't gehucht Koppenaksvoorde.

Toponymie

Broekkerke es vo nen êeste kêe vermeld round 800 ip e karte va Malbrancq die 't westelyk dêel van de delta van de Aa toogt, lyk Ecclesia in broco wa Latyn es vo "kerke in't moeras". In 1139 noemde 't Brockerka, in 1142 Bruckerque en in 1168 Brocherche. In de dertiende êeuwe noemde et Brokerke en in de vêertiende êeuwe Broukerke. Round 1760 es ton uutendelyk de Fransche orthografie Brouckerque definitieve angenoomn.

Woaterweugn

Broekkerke es e vrêe landelyke gemêente in't Blootland mè vele veld'n die vrêe lêeg ligg'n (d'ôogte in de gemêente varieert mo tusschn de 0 en 8 mèiters). Der lôopn deur Broekkerke ton ôok teffrente woaterweugn.

• Der zyn drie kanoaln in Broekkerke, en nog êen juuste buutn de grenzn dervan:
  • De Broekburgvoart die van Broekburg o de westkantn van Broekkerke nôordôostwoarts richtienge de binn'noav'ns van Duunkerke lôopt. De Broekburgvoart vormt de schreeve van Broekkerke mè de gemêentn Kroaiwyk en Loon.
  • 't Smollere gedêelte van't Kanal van de ôoge Kolme, en ounderdêel van de Kolme, lôopt o d'ôostkantn van de gemêente en vormt 't schee'n mè Pitgam.
  • 't Ofvoerkanoal van de Kolme strôomt vanuut 't zuudwestn en lôopt by Koppenaksvoorde oovr in de Broekburgvoart.
  • O de nôordkantn van Broekkerke (juuste buutn 't groundgebied van de gemêente) eie nog 't Ofvoerkanoal van Mardyk, en aftakkienge van de Broekburgvoart, die richtienge Mardyk en 't Duunkerksche hoavnbassin lôopt.
• In Broekkerke ligt o de westkantn by Koppenaksvoorde de Vliet, en oude riviere die de schreeve vormt mè Broekburg.
• Der zyn ôok masse klêendere ofwoateriengsjes die deur de veld'n lôopn lyk de Pauw Dyck, de Langhe Gracht, de Sparrewaerde Dyck, de Waeter Plecke Dyck, de Melk Dyck, de Lamberts Dyck, de Vinckelsgracht, de Reep Dyck en de Schey Dyck. Die latstgenoemde vormt (lyk da de noame 't zegt) 't schee'n mè de gemêente Loberge.

Beziensweirdigeedn

• De Sent-Omerskerke, woavan de torre uut de vêertiende êeuwe es
• 't Kastêel van Afgand uut de neegntiende êeuwe in klassiekn styl
• 't Staduus van Broekkerke, ôok wel Wethuys enoemd, gebouwd in 1868
• d'Oude pastorye
• Der zyn ôok verschilligte kapellekes in Broekkerke: kapelle Ter Mille Boom, de Notre-Dame de Bonsecours-kapelle en d'Heÿlige Moeder Anna-kapelle

• 
  De Sent-Omerskerke in Broekkerke
• 
  't Kastêel van Afgand
• 
  't Staduus van Broekkerke, ôok wel Wethuys enoemd
• 
  d'Oude pastorye
• 
  De Vliet by Koppenaksvoorde

Ofbeeldiengn die ier by passn ku je vien in de categorie Brouckerque van Wikimedia Commons.