Oazebroeke

Oazebroeke Hazebrouck
Oazebroeke in't arroundissement Duunkerke
Geografie
Regio	Hauts-de-France
Departement	Noorderdepartement
Arroundissement	Duunkerke
Kanton	Oazebroeke
Coördinoatn	50°43′NB 2°32′OL
Ippervlak	26,2 km²
Inweuners
Inweuners Bevolkiengsdichtheid	21.685 (2016) 828 inw./km²
Andere
Burgemêester	Bernard Debaecker 2014-2020
Postcode	59190
Webadres	Officieeln site van Oazebroeke

Oazebroeke ofte Haezebroek in't Frans-Vlams (Frans: Hazebrouck, Nederlands: Hazebroek) es 'n stad en gemêente in Vrankryk in't Noorderdepartement. 't Ligt in Frans-Vloandern, in't midd'n van de Franschn Westoek. Oazebroeke grenst an de gemêentn Oundegem, Koaster, Borre, Oud-Berkyn, Moerbeke en Woalskapelle.

Oazebroeke ligt in't Frans-Vlamsche Outland. Der weun'n mêer of 20.000 mienschn, en 't es doamee de grotste stad in't binn'nland van d'n Franschn Westoek.

Geschiedenisse

An zyn noame kun je ol ziene da Oazebroeke Vlams wos in 't verleen. En oaze is e bêestje dat op e keun trekt en broek wilt "moeras" zeggn. In 't begun wos 't stadje nie mêer of e drassig bus. 't Dorp es nen êestn kêe vermeld round 't joar 1000 ounder de noame Hasebroch. In 1122 wierd et eschreevn lyk Hasbruc. 't Is moa sedert 1678 mè de Vrede van Neymeegn da 't gebied voegoed Frans kwam, achter da Lodewyk XIV grôote dêeln veroverd ha van 't groafschap Vloandern, da ip da moment en ounderdêel wos van de Spoansche Nederlandn.

Tusschn 1857 en 1926 wos Oazebroeke d'ôofdplekke van't arroundissement Oazebroeke, da 't zuudelyk gedêelte van't uudige arroundissement Duunkerke oumvattigde (zynde 't groundgebied van de vroegere kasselry'n Kassel en Belle). In Oazebroeke koutigd'n ze nog Frans-Vlams tout in de twingtigste êeuwe, mor dad es surtout achter d'n Êestn Weireldoorloge styf ard verminderd en nu zyn der nog mo letter mienschn die Vlams klappn.

Beziensweirdigeedn

• De Sint-Elôoiskerke, e loat-gotische allekerke uut 1432
• D'Ouze-Lieve-Vrouwekerke
• D'Illig-Èrtekerke
• 't Staduus uut 1820 in classicistischn styl
• 't Vroegere Ogustieneklôoster uut de zestiende êeuwe da gebouwd es in d'n styl van de Vlamsche renaissance, woar da nu 't steedelyk museum in es
• 't Vroeger uus van Jules Auguste Lemire, da nu ôok e museum es
• De reuzn van Oazebroeke lik Tisje-Tasje en Roland van Oazebroeke
• De Vlamsche meulns in 't rounde
• In en round Oazebroeke liggn der ôok êenigte Iengelsche soldoatekerkoovn uut d'n Êestn Weireldoorloge:
  • 't Cinq Rues British Cemetery, mè mêer of 200 groavn
  • La Kreule Military Cemetery, mè mêer of 500 groavn
  • Ôok ip't Sint-Elôoiskerkof, êen van de gemêentelyke begroafplekkn, ligter e perk mè ounderd'n ôorlogsgroavn

Verkêer en vervoer

Oazebroeke ligt nie direkt an en ottostroade, mor es wel e knooppunt van geweune boan'n tusschn de steed'n Belle, Stêenvoorde, Kassel en Sint-Omoars.

In Oazebroeke ligter e stoasje an de kruuschienge van twêe yzerboan'n: de lynne Rysel-Kales (ôost-westverbindienge) en de lynne Duunkerke-Atrecht (nôord-zuudverbindienge). In tydde woarn der nog twêe lynn'n mêer: die van Oazebroeke noar Meregem en dedie van Oazebroeke noa Boeschepe en De Schreve (die in't verlengde lag van de West-Vloamsche lynne 69 van Kortryk noar Poperienge). De twêe latstgenoemde yzerboan'n zyn ondertusschn ipgebrookn. In't stoasje van Oazebroeke passeern en stoppn der antins ôok TGV's die ryd'n van Parys oovr Atrecht richtienge Duunkerke.

Deur't groundgebied van de gemêente, o de nôordkantn van't center, ligt ôok en aparte spoorlynne vo TGV's tusschn Rysel en Kales en ezo vodder noa d'n tunnel ounder 't Iengels Kanoal. Dedie ligt niet an't stoasje en ezo kunt den tring in êen trek deure ry'n.

Bekende inweuners

• Maria Petyt: begynne, mystica en schryfster
• Jules Auguste Lemire: paster en politieker, burgemêester van Oazebroeke van 1914 tout 1928 (oloewel dat 'n eigntlyk in Oud-Berkyn geboorn es)
• Cédric Vasseur: coureur

• 
  De Sint-Elôoiskerke
• 
  't Staduus van Oazebroeke
• 
  't Vroegere Ogustieneklôoster, nu e museum
• 
  Reus Tisje-Tasje
• 
  Cinq Rues British Cemetery

Ofbeeldiengn die ier by passn ku je vien in de categorie Hazebrouck van Wikimedia Commons.